11 polis girelibohan

CEBU, Philippines — Onse ka mga sakop sa kapolisan sa Sawang Calero Police Station sa Cebu City Police Office (CCPO) ang girelibohan sa pwesto human gialegar nga nangilkil ug usa kanila gireklamong nanglugos.

Si Police Brigadier General Ronnie Montejo, Police Regional Office (PRO)-7, miila sa iyang mga sakop nga girelibohan mao silang Police Staff Sergeant Celso Colita, Police Chief Master Sergeant Eric Edgar Emia, Police Corporal Rochelito Mabulay, Police Corporal Emmanuel Martinez, PSSgt. Joseph Alcoseba, PSSgt. Michael Rhey Cabizares, PCpl. Ejill Ferrolino, PCpl. Carlo Irizari, PCpl. Junel Pedroza, PCpl. John Carl Aceron ug PCpl. Georny Abrasado.

Base sa inisyal nga imbestigasyon, si Montejo miingon nga usa ka 35-anyos nga babaye ang miduol sa Integrity Monitoring and Enhancement Group Visayas Field Unit (IMEG-VFU) ug mireklamo batok sa maong mga polis.

Gipasanginlan sila nga mironda sa ilang balay sa Tungkil, Minglanilla tungod sa pasangil nga naghupot sila og armas nga walay search warrant nga gipakita.

“Upon search, no firearm was found. Instead said operatives took valuables from her including money, pieces of jewelry, a bag, and an ATM card,” matud ni Montejo.

Ang reklamante gikatahong gidala sa mga polis diha sa Sawang Calero Police Station  ug matud pa illegal nga gitanggong niadtong Marso 10, 2021 ala-una sa kaadlawon.

Gawas sa gibuhat sa maong mga polis gipasanginlan niini si Colita nga milugos kaniya kaduha ug gikilkilan siya og P170 mil nianang adlaw nga siya gibuhian niadtong Marso 11,2021.

Matud pa gikuyogan siya ni Colita sa bangko aron mag-withdraw sa maong kwarta ug pagkahuman gidala siya niini sa usa ka hotel ug didto gilugos.

Human sa reklamo, ang maong mga polis gipangrelibohan ug gibalhin sa Police Regional Office 7 Holding Area Unit samtang gipaabot ang pagsaka og kaso administratiba.

Samtang kasong kriminal sab nga robbery, Arbitrary Detention; Anti-Torture Law; Grave Coercion and Grave Threats ang gipasaka batok kanila kagahapon diha sa Cebu Provincial.

“Nasagmuyo ko sa nahitabo labi na nga may kalambigitan ang akong mga kauban sa buhat. Dili gyud nako ni i-tolerate kung mapamatud-an nga nakalapas sila sa balaod. Atubangon nila kung unsa may angay nga ipahamtang nga silot sa ilang gibuhat,” masuk-anong pamahayag ni Montejo sa press conference kagahapon.

“Akong dakong hagit sa mga kapulisan dinhi sa Central Visayas, isip kita man ang ehemplo sa katawhan, atong ipakita ang tinud-anay nga serbisyo sa Philippine National Police nga Maka-Diyos, Makabayan, Makatao ug Makakalikasan ug gani atong isakripisyo ang usa nato nga kinabuhi alang sa kaayuhan sa tanan,” dugang pa niya.

Samtang si Police Colonel Josefino Ligan, hepe sa CCPO mipahibalo nga lakip sa girelibohan sa katungdanan ang hepe sa Sawang Calero Police Station  alang sa himuong administrative investigation ug susihon kun duna kini lapso nganong nahitabo kini ubos sa iyang pagdumala..

Mipuli kaniya sa pwesto si Police Major Eraño Regidor isip officer-in-charge sugod niadtong Sabado. —IBM (BANATNEWS)