Pamakuna sa mga frontliners sa Madridejos sugdan karong adlawa

CEBU, Philippines — Magsugod na og pamakuna sa dili momenus 700 ka mga frontliners sa Lungsod sa Madridejos karong adlawa. Target nga bakunahan mao ang mga sakop sa Barangay Health Emergency Response Teams (BHERTS), mga empleyado sa Rural Health Unit, MDRRMO ug social workers.

Sumala sa Municipality of Madridejos facebook page nga ang vaccination ipahigayon sulod sa duha ka adlaw sugod karong adlawa Marso 30 hangtod Marso 31, 2021.Sumala sa lungsod, ubay-ubay na sa mga frontliners ang nipadayag og interes nga magpabakuna.

Samtang didto sa Siyudad sa Naga dili momenus 392 ka mga healthcare workers ug frontliners ang nabakunahan sulod sa lima ka adlaw nga pamakuna gamit ang Sinovac ug AstraZeneca vaccine.

Apil sa mga nabakunahan didto sa syudad mao ang mga healthcare workers sa Vicente Mendiola Center for Health, Barangay Health Emergency Response Teams (BHERTs), Barangay Health Workers, social Worker ug quarantine facilities staff.

Base sa facebook post sa Naga City Government walay nakasinate og dili maayong epekto kun "major adverse effects" ang mga nabakunahan. —MEL (BANATNEWS)