Niñal: Unta dili na lisud-lisoron ang mga drayber ug operator

CEBU, Philippines — Dili na lang unta lisod-lisoron ang proseso alang sa mga drayber ug operator  sa higayon nga maaprobahan ang rekomendasyon sa Jeepney Task Force (JTF)  nga buksan og balik ang tanang rota sa mga tradisyonal nga Public Utility Jeepney sa Siyudad sa Sugbo.

Kini maoy sentimento ni Kapitan Clifford Niñal sa Barangay San Nicolas kinsa board member Cebu Integrated Transport Service Multi-purpose Cooperative (CITRASCO).

“Luoy na kaayo ang mga drayber, dili na lang unta lisud-lisoron kon pananglitan gani makabiyahe na og balik ang tanang rota”, ni Niñal pa.

Sa pagkakaron wala pa’y nitumaw nga guidelines diin padayon pa nga tun-an sa buhatan ni Mayor Edgardo Labella ang rekomendasyon sa JFT. Matud ni Niñal nga unta basic inspection na lang ang pagabuhaton diin andam nga  mokooperar ang operators sa pagpatuman sa health protocols ilabi na sa pagbutang og barrier sa ilang mga unit. Giangkon ni Niñal nga pipila sa ilang mga unit ang nangalata na gumikan kay dugay na kini nga wala magamit hinungdan nga dako ang ilang alkanse.

Ug dako kaayong tabang sa industriya sa transportasyon kong mabalik na ang  tanang rota. BDB (BANATNEWS)