Barangay Bakilid gilaumang madeklara nga drug cleared

CEBU, Philippines — Gitinguha karon sa kagamhanan  sa Dakbayan sa Mandaue ug Philippine Drug Enforcement Agency-7 ang pag-ila na unya og drug free nga barangay sa tuig 2021.    

Sa niaging panagtigom tali sa City Anti-Drug Abuse Council (CADAC), Philippine National Police (PNP), Department of Interior and Local Government (DILG)  ug PDEA-7 ilang gihisgotan nga ang Barangay Bakilid ang nag-request na alang sa pagdeklarar nga drug cleared barangay.

Si Konsehal Nerissa Soon-Ruiz, focal person sa CADAC nagkanayon nga labing unang barangay sa  Mandaue ang Barangay Bakilid nga cleared barangay kon kahatagan na unya og pagtugot ang request niini nga madeklarar nga cleared sa ilegal nga drugas gikan  sa kinatibuk-ang 27 ka barangay sa siyudad.   

Matud ni Ruiz nga ang Barangay Bakilid mao unya ang magsilbing role model sa 26 pa ka   barangay sa Dakbayan sa Mandaue. Si Ruiz masaligon nga madeklarar nga drug cleared ang Barangay Bakilid tungod kay gamay na lang ang gikinahanglan niining dokumento.

Si Mandaue City PDEA Agent Geoffrey Flores nagkanayon nga pipila na lang ka  drug personalities ang dili cooperative hinungdan nga ilang gipadayon ang house visitation sa pagdasig kanila alang sa pag-take advantage sa intervention program sa kagamhanan.    

Gipasabot ni Flores nga alang sa pagdeklarar isip cleared barangay gikinahanglan nga pagahimoon mao ang pagtala sa tanang personalities nga anaa sa listahan sa watchlist sa barangay.  

Ug sigurohon usab nga kompletohon ang intervention program nga gihatag sa gipuy-ang niining barangay. BDB (BANATNEWS)