Mga paso nga cash cards i-activate gihapon
CEBU, Philippines — Dihang nanghatag ang Cebu City Government sa cash card gikan sa Landbank of the Philippines sa mga senior citizens niadtong buwan sa Desyembre sa miaging tuig daghang mga senior citizens ang wala makapa-activate niini ug napaso na hinuon.
Ang pangulo sa Office of the Senior Citizens Affairs(OSCA) Cebu City Jeffrey miingon nga kinahanglan untang i-activate dayon ang cash card human nadawat apan tungod kay sagad dili man suhit paggamit niini daghang cash cards ang na-deactivate.
Hinuon kadtong mga seniors nga wala ka activate sa ilang cash cards sa oras mahatagan maka-withdraw gihapon sa ilang financial assistance pinaagi sa liaison officers sa OSCA ug sa barangay nga mangita kanila aron motabang kun unsaon pag-activate aron magamit ilang cash cards.
Ang mga seniors makadawat karong adlawa sa ilang tag P3 mil nga financial assistance alang sa buwan sa Enero, Pebrero ug Marso. Kadtong mga senior citizens nga dili makakuha niini sa gitakdang adlaw adto na nila kini makuha sa OSCA.
Ang siyudad duna karoy 85,000 ka rehistradong senior citizens nga benepisaryo sa cash assistance sa siyudad.
Ang mga balay sa mga seniors pabutangan lang og papel ug pangalan ug senior citizen ID number sa benepisaryo diha sa gawas.
Kinahanglan sab sila magsul-ob og facemask, dunay kaugalingong ballpen ug mag-sanitize sa pagdawat sa financial assistance aron malikayan ang panagtakod sa COVID-19.— IBM (BANATNEWS)
- Latest