Napalgang patay sa Talisay nailhan na

CEBU, Philippines — Nailhan na ang lalaking napalgang patay didto sa sitio Campinsa, Barangay Tapul, Dakbayan sa Talisay.

Ang biktima nga naka angkon og samad pinusilan mao si Jerry Segundino, 18 anyos nga taga sitio San Miguel, Barangay Linao sa nahisgutang siyudad.

Si Joseph, amahan sa namatay maoy niila sa iyang anak didto na sa punerarya.

Siya nagkanayon nga nakit-an pa niya ang iyang anak mga alas 12 sa tungang gabii apan sa iyang pagmata mga alas 3 sa kadlawon wala na kini sa iyang gihigdaan.

Si Police Lt. Col. Gerard Ace Pelare, pangu sa Talisay City Police Station nibutyag nga ilang gitan-aw ang pipila ka mga anggulo kung kinsa ang naka interes sa kinabuhi sa biktima.

Ila sab susihon ang mga kaila sa namatay nga posibleng makatabang sa dagan sa imbistigasyon.

Si Segundino napalgang patay niadtong Martes sa kadlawon nga adunay usa ka samad pinusilan sa iyang buko-buko. —MEL (BANATNEWS)