Socco: Mga bayranan sa clearances tangtangon una

CEBU, Philippines — Niawhag ang hunta probinsiyal ngadto sa local government units, ahensiya ug buhatan sa gobiyerno nga i-waive o tangtangon una ang mga bayranan o charges sa pagkuha og clearance, permits ug uban pa alang sa mga nangita og trabaho.

Ang resolusyon nga gipangamahanan ni Bokal Glenn Anthony Soco gipasar kagahapon sa hapon sa provincial board.

Nasayran nga ang ubang aplikante maglisod sa pag-comply sa mga gikinahanglang dokumento ngadto sa ilang giaplayan tungod kay adunay bayad ang pagkuha sa mga dokumento nga ilang gikinahanglan.

Matud ni Socco nga ang maong bayranan dugang gastohan kini sa usa ka indibidwal nga walay kwarta tungod kay nawad-an og trabaho.

Sa Pilipinas, kasagaran sa employers mangayo sa aplikante og barangay clearance, National Bureau of Investigation Clearance, community tax certificate, certificate of birth, certificate of marriage, police clearance ug uban pa.

Ang maong mga dokumento makuha gikan sa government offices.

Matud usab ni Socco nga usahay mao kini ang hinungdan nga dili na hinuon makatrabaho ang aplikante tungod kay dili maka-comply sa mga rekisitos nga gikinahanglan sa trabahoan kay wala kini ikabayad sa mga bayranan. —BDB (BANATNEWS)