CCPO andam na sa Semana Santa; CPPO mopadala og polis sa amihanan
CEBU, Philippines — Ang direktor sa Cebu City Police Office Police Colonel Josefino Ligan nagkanayon nga preparado na ang kapolisan sa Dakbayan sa Sugbo alang sa umaabot nga Semana Santa.
Matud ni Ligan nga nakigtagbo na siya sa iyang mga hepe ug ilaha nang gituki ang mga kalihokan kalabutan sa Semana Santa.
Ang mga hepe aduna na kini kasayoran sa gidaghanon sa mga simbahan ubos sa ilang area of responsibility lakip usab ang mga merkado nga ilang tutokan.
Ang kapolisan ubos kini sa full alert status ug silang motubag sa tanang insidente.
Giawhag ni Ligan ang katawhan nga mosunod sa tanang gipatuman nga minimum health protocols.
Nakig-alayon usab ang kapolisan sa mga kadagkoan sa simbaha kalabot sa ilang mga kalihokan subay sa Semana Santa.
Sa laing bahin, mopadala og dugang 30 ka polis ang Cebu Provincial Police Office ngadto sa Bantayan Island ug sa Hagnaya Port sa Lungsod sa San Remigio.
Ang deployment sa maong mga polis ubos kini sa "Lakbay Alalay" program sa kapolisan sa paghatag og seguridad sa mga biyahedor ug mga lokal nga turista nga gilauman nga modagsa atol sa Semana Santa. —Romeo T. Limpangog/BDB (BANATNEWS)
- Latest
