100 ka panimay sa Tanke Talisay gibisita sa kapolisan

CEBU, Philippines — Gibista sa kapolisan sa Talisay ang mokabat sa 100 ka panimay sa sitio Magay, Barangay Tanke, Dakbayan sa Talisay kagahapon.

Kini human sa tulo ka adlaw nga sunod-sunod nga operasyon sa otoridad batok sa ilegal nga drugas.

Suma pa ni Police Lt. Col. Gerard Ace Pelare, pangu sa Talisay City Police Station nga gihimo nila kini nga paagi aron makuha ang pagsalig sa katawhan ug mosumbong sa mga dautang elemento sa ilang lugar.

Lakip sa gihimo sa kapolisan mao ang clean up drive, ingon man pagpanghatag og food packs.

Ang sitio Magay sa Barangay Tanke maoy usa sa mga lugar nga gihugpaan sa ilegalista ug gumikan sa subsob nga operasyon ug pakig alayon sa katawhan nimenos ang mga durugista sa lugar.

Giataw ni Pelare nga ang ilang programa giabagaan sa aktibong City Advisory Council Vice Chairman Cyril Velasco. Ang ilang grupo nipasalig nga mohimo sab og pansayan nga magamit sa mga residente.— MEL (BANATNEWS)