Kolaborasyon tali sa SK ug barangay gikinahanglan
CEBU, Philippines — Bisan giisip nga independente ang Sangguniang Kabataan, gidasig gihapon kini nga makig-kolaborasyon sa dagkong opisyales sa barangay alang sa ubang programa niini.
Kini maoy gibutyag ni Sangguniang Kabataan Federation- Cebu City President Jessica Resch kinsa miingon nga dakong importansya sa papel sa SK sa komunidad.
Sumala pa ni Resch dunay nakalinya nga mga programa ang SK alang sa kabatan-onan ug mosamot kadaghan ang maka-benipisyo niini kun dunay kolaborasyon.
Usa si Resch sa nitambong sa panagtigom sa mga kapitan sa Siyudad sa Sugbo kun diin nadungog usab niya ang ubang concerns niini kalabot sa pagka-independente sa SK.
Nasayran nga gibuwag na ang annual budget sa SK ug barangay.
Nahisgotan usab ang ordinansahon nga giduso ni Resch sa miaging buwan nga nag-awhag sa tanang mga barangay sa siyudad nga mogahin og office space alang sa Sangguniang Kabataan officials ug magsilbi usab kini nga barangay youth center.
Pipila ka mga kapitan ang nialma niini sanglit ang barangay ra man gihapon ang giingong nagbayad sa kuryente ug tubig sa buhatan SK.
Apan nasuta atol sa panagtigom nga mahimo na nga makagamit ang SK sa kaugalingon nila nga budget alang sa kuryente , tubig ug ubang gastohanan sa ilang opisina.
Gikumpirmar kini ni Atty. Ian Kenneth Lucero, ang direktor sa Department of Interior and Local Government (DILG-Cebu City) kinsa usa usab sa mga dinapit sa maong panagtigom.
Sa nangaging interview, gibutyag ni Resch nga importante kaayo ang buhatan sa SK ug youth center sanglit mao kini ang pamaagi nga mahatagan og igong lugar ang kabatan-onan sa mga barangay sa higayon nga mopadangat sila sa ilang mga concern ug sa susamang higayon adunay haom nga lugar ang SK officials alang sa pagahimuon nila nga mga tigom.
Nalatid sa ordinansahon nga kinahahanglan nga accessible kini sa ilang mga konsituwente sa bisan unsang orasa. —IBM (BANATNEWS)
- Latest