Traffic violator nagkadaghan–CCTO
Cebu, Philippines — Nisaka ang gidaghanon sa traffic violators sa Dakbayan sa Sugbo sulod sa 15 ka adlaw sa buwan sa Marso niining tuiga.
Ang Cebu City Transportation Office (CCTO) nibutyag nga adunay 6,317 ka violators ang naisyuhan nila og citation tickets gikan sa Marso 1 hangtud sa 15, 2021.
Ang maong gidaghanon mas taas kompara sa 5,674 ka citation tickets nga naisyu sa maong traffic agency sulod usab sa 15 ka adlaw niadtong buwan sa Pebrero niining tuiga.
Kasagaran sa nabuhat nga kalapasan sa maong mga motorista naglangkub sa no stopping, pag-parking sa sidewalk, guba nga plate lights ug head lights, ug uban pa.
Sa maong mga adlaw aduna usab sila‘y na -clamp nga 338 ka sakyanan.
Ang CCTO subsob usab ang ilang kampaniya sa pagukod sa mga pribadong sakyanan ug taxi units nga magpataka og parking diha sa kadalanan sa Siyudad sa Sugbo.
Subay niini, ang CCTO niawhag sa mga drayber na nakalapas sa balaod sa trapiko nga dili pasagdan ang ilang pending nga citation tickets aron dili kini maisyuhan og bench warrant. Ang mga motorista giawhag usab nga motuman sa balaod sa trapiko aron dili mahasol kong maatlan sa surpresang operasyon sa CCTO. (BANAT NEWS)
- Latest