Dul-an 60 ka balay ‘ugdaw

CEBU, Philippines — Dili mominos sa 50 ka mga panimalay ang naugdaw atol sa sunog sa may Sitio Club Kawayan Alaska, Barangay Mambaling ning Dakbayan sa Sugbo kagahapon sayo sa buntag.

Nadawat sa kabomberohan ang alarma alas 5:22 ug nakontrol kini alas 6:18. Gituohan nga nagsugod kini gikan sa panimalay ni Ceding Siacor nga  giingong gipuy-an sa apo niini nga ginganlan og Raven.

Gibana-bana nga moabot P150 mil ang danyos sa maong sunog hinuon walay naangol o nakalas.

Matud pa ni Fire Officer 3 Emerson Arceo, Fire Investigator nga nahinabi sa Banat News daghan sila og gisubay nga mga posibleng hinungdan sa maong sunog.

Lakip sa ilang susihon ang report nga illegal tapping sa linya sa kuryente ang hinungdan niini sanglit ang maong balay diin nagsugod ang sunog walay kaugalingong koneksyon sa kuryente.

Ang usa sa mga nasunogan, Tanny Cardeño nagmahay sab sa Mambaling Fire Volunteers tungod kay dugay nakaresponde dayon bisan duol ra kaayo ang barangay hall dinhi sila nagbase.  Matud pa pagabot didto, tulo na ka balay ang  nasunog maong gibasol niya ang mga bombero kay dugay kaayong naabot.

Apan ang kabomberohan miingon nga nalangay sila tungod sa mga sakyanang ilegal nga giparking daplin sa dalan. Matud pa sa Department of Social Welfare and Development  99 ka pamilya ang apektado sa maong sunog nga nagpuyo sa 59 ka panimalay nga naugdaw.  Ang mga nasunogan naa karon nipasilong sa Viking gym.

Sa laing bahin,  sa dili pa tak-opan ang Fire Prevention Month ang Cebu City Fire Office(CCFO) mopahigayon og mga kompetesiyon nga dunay dagkong ganti ug mahimong salmotan sa mga residente sa siyudad sa Sugbo.

Ang tema sa Fire Prevention Month karong tuiga “Sa pag-iwas sa sunog hindi ka nag-iisa.”

Sigon ni Senior Fire Officer 2 Wendel Villanueva, tigpamaba sa CCFO nga duna sila’y ipahigayon nga photography contest alang sa mga amateur ug professional photographers ug duna say singing ug song writing contest nga gitawag og Singing Handog Laban sa Sunog.

Ang photography contest dunay premyo nga P30,000 sa first prize, P20,000 second prize ug P10,000 sa third prize samtang sa song writing ug singing category makadawat sab og P30,000 ang first prize, P20,000 second prize ug P10,000 sa third prize.— Decemay P. Padilla/IBM (BANATNEWS)