Polis “nangilkil” sikop sa kaubang polis

CEBU, Philippines — Usa ka polis ug hepe sa intelligence unit sa Carmen Police Station ang nadakpan sa entrapment operation nga gilusad sa laing kaubang polis tungod sa reklamo nga kini nangilkil.

Ang gisikop mao si Police Executive Master Sergeant Julius Medura Obañana, hepe sa intelligence unit sa Carmen Police Station sa lungsod sa Carmen. Ang operasyon gihimo sa mga sakop sa Integrity Monitoring and Enforcement Group-7, Regional Special Operations Group-7 ug sa mismong mga kauban niining polis diha sa Carmen Police Station kagahapon sa hapon.

Ang operasyon gipangulohan ni Police Major Alejandro Batobalonos.

Usa ka Arlene Pitogo Maglasang maoy mireklamo batok sa suspek tungod sa pasangil nga pagpangilkil kaniya aron iuli niini ang motorsiklong gigamit sa anak niini nga nadakpan sa grupo sa suspek.

Matud pa ni Batobalonos, nadakpan sa buybust operation ang anak sa nagreklamo. Atol sa pagdakop nagsakay kini og motorsiklo apan nahibulong ang reklamante tungod kay gikuha ang motor apan wala kini giapil sa lista sa imbentaryo sa mga ebidenyang nasakmit.

Tungod niini, ilang giduol ang suspek aron kuhaon ang motorsiklo apan gikatahong gipangayoan sila niini og P3 mil aron ma- release ang motor.

Ang reklamante nisumbong sa IMEG-7 hinungdan sa gilusad nga entrapment operation.

Nasakmit gikan sa suspetsado ang P3 mil nga marked money, armas niini, ug mga bala, PNP ID ug ang motorsiklo.

Padayon pa karon nihimo ug imbestigasyon ang kapulisan may kalabutan sa pagkasikop sa maong polis. —Rowena D. Capistrano/IBM (BANATNEWS)