P3.4 milyones nga shabu nasakmit sa buy-bust operation
Cebu, Philippines — Mokabat sa P3.4 milyones nga kantidad sa shabu ang nasakmit sa joint buy bust operation sa kapolisan ug Philippine Drug Enforcement Agency (PDEA) 7 diha sa Barangay Poblacion Oriental sa Lungsod sa Consolacion.
Si Police Master Sergeant Aquilles Bacorta sa Consolacion Police Station miila sa pusher nga ilang nadakpan nga mao si Lesbert Borres,hingkod ang panuigon nga taga Dakbayan sa Sugbo.
Si Borres giila sa PNP ug PDEA 7 nga top 1, regional level nga pusher og shabu.
Matud pa ni Bacorta nga taud taud na nilang namatikdan ang illegal nga kalihukan ni Borres hinungdan nga ilang gipahigayon ang buy-bust operation. Nasakmit sa mga otoridad ang lima ka dagkung pakete sa gituhuang shabu nga mitimbang og 500 ka gramo.
Samtang giklaro sa Philippine Drug Enforcement Agency Central Visayas nga wala pay drug cleared barangay ang Dakbayan sa Sugbo.
Gitug-an sa Rehiyonal nga Director sa PDEA-7 Levi Ortiz nga wala pay nadeklarar nga drug cleared sa 80 ka barangay sa siyudad ug mao kini ang ilang gipaningkamotan karon.
Sumala pa ni Ortiz, ilaha karon ginamonitor ang tanan nga mga barangay tungod kay mao kini ang ilang basehan o barometro sa ilang kampanya batuk sa ginadili nga drugas. Lakip sa ilang gisusi karon mao ang mga opisyal sa barangay nga wala kaayo mosuporta sa ilang Barangay Drug Clearing Program, tungod kay posible ilaha kini nga pasakaan ug tukma nga kaso.
Gipasabot ni Ortiz, dili pa nila mahimong ma-clear ang usa ka barangay kun duna pay presensya sa ginadili nga drugas, usher, pusher ug drugden, hinungdan nga kinahanglan gayud ang pagtinabangay sa tanan. — Rowena D. Capistrano ( BANAT NEWS)
- Latest
