Motorista nga mosubay sa bike lane dakpon sa Mandaue

CEBU, Philippines — Mga motorista nga adto mosubay sa gipahimutang nga bike lane sa Dakbayan sa Mandaue ang gipangdakop.                                       

Suma pa ni Atty John Eddu Ibañez, executive secretary ni Mayor Jonas Cortes nga isyuhan og citation tickets ang mga masakpan.

Hinoon ang maaktuhan sa unang higayon nga mga motorista ila una kining pahimangnuan.                                

Gipasabot ni Ibañez ang mga motorista nga ilang gibutang ang mga signage sa tuyo nga kapanalipdan ang mga magsakay og bisiklita.                                       

Gitataw niya nga ang motorista gihapon ang manubag sa kaakohan sa higayon nga ilang mabanggaan ang biker sa ilang pagsulod sa gipahimutang nga bike lane sa mga dalan sa dakbayan.                             

Sa nasayran ang kagamhanan sa Dakbayan sa Mandaue pinaagi sa pag-abag sa Department of Public Works and Highways (DPWH) 7 ang nag-install og mga plastic bollards sa mga dagkong dalan isip kabahin sa gipasiugdahan nga bike lane network.                            

Gawas sa bike lane gipamutang usab ang bicycle repair station ingon man ang bike parking racks sa nagkadaiyang dapit sa dakbayan. —MEL (BANATNEWS)