600 ka vendors ibalhin sa pagsugod sa proyekto sa Carbon Market
CEBU, Philippines — Dili momenus sa 600 ka mga vendors sa Carbon Public Market ang ibalhin og pwesto sa higayon nga sugdan na karong buwana ang pagpanindot sa naasoy nga merkado.
Suma pa ni Irvin Cabales, Cebu City Market Operations Division Chief nga na-identify na nila ang dili momenus 600 ka mga vendors gikan sa Freedom Park ug Warwick Barrack nga maapektuhan sa Phase 1 sa proyekto.
Ang ground breaking sa pag-trabaho sa Carbon Market mahitabo karong Marso 17.
Ang proyekto abagahon sa Megawide Construction Corporation diin ang phase 1 nagkantidad og P5.5 billion.
“Naka submit nata og initial numbers sa Megawide but we want to be sure nga mao gyud ni ang exact nga numbers so nata karon nagtrabaho na unya mag-meeting ta with our OIC para ma plastar nato tanan”, segun ni Cabales.
Dugang ni Cabales nga human sa ground breaking sugdan na usab ang pag-trabaho sa pagbutang og stalls sa Unit II diin adto ipahiluna ang mga apektadong manindahay.
Ang kagamhanan sa siyudad nagplano sab sa pag-upgrade sa pipila ka ambulant vendors isip regular stallholders. Sa nasayran ang Megawide ug City Government nagpinirmahay na sa Joint Venture Agreement (JVA) aron i-redevelop ang Carbon Public Market.
Apan pipila sa mga manindahay ang dili pabor sa re-development sa carbon market sa kabalaka nga mahiadto kini sa pribadong kompaniya.
Si Mayor Edgardo Labella mipasalig nga ang siyudad dili mo-give up sa ownership ug administrative power sa Carbon Market kun kini ma-redevelop na. —MEL (BANATNEWS)
- Latest
