SEC mipahimangno sa kababayen-an magamping aning investment scams

CEBU, Philippines — Kababayen-an gipahimangnoan nga dili mokumpiyansa batok niining mga online investments nga nagtanyag og paspas nga pagdako sa ginansiya bugti sa ibubo nilang puhonan nga maoy gihimong pangdani sa  mga mangingilad.

Mao kini ang pahimangno ni Securities and Exchange Commission-Cebu Extension Office (SEC-CEO officer-in-charge Alma Marie Dalena karong gisaulog sa kalibotan ang  International Women’s Day kagahapong adlawa Marso 8.

“Tukma kini nga panahon aron manawagan sa publiko samtang kita nagsaulog sa Pangkalibutanong Adlaw sa Kababayen-an.  Ang mga mangingilad posibleng moengganyo sa mga kababayen-an nga nabilin sa mga puluy-anan o bisi sa ilang trabaho ug nagbalanse sa pinansyal  samtang nag-atubang sa pangkalibutanong krisis sa panglawas,” matud pang Dalena kinsa usa sab ka abogada.

Matud pa sa pamahayag sa SEC-CEO naghatud og dakong problema ug kahasol sa panginbuhian kining coronavirus disease (Covid-19) apan subo lang nga gipahimuslan kini sa mga mangingilad pinaagi sa mga “get-rich-quick” nga mga investments.  Gituyo kikni aron makadani og daghang mobubo og puhonan.

Sa pagsud ning tuiga, ang SEC nakapagawas na og walo ka advisories batok sa nagkalain-laing investment scams sa online nga gitawag nga Ponzi-scheme investment scams sama sa Masa Mart Business Center OPC ug Masa Mart Enterprise OPC, Royal O’ Financial Consultancy Services, Solmax Global Limited ug Igniter 100, Jamsmart, Bitaccelelerate/BitaccelateProject.com/BA/Bitaccelerator, R.L. Aggregates ug  Diversified Lending Group, Inc., ug RGS World Marketing Corporation/RGS Online Shop/ RGS Online Marketing ug RGS Foundation.  Matud pa ang mga kababayen-an maoy sagad puntariyahon sa mga scammers sanglit sila maoy nagdala sa pundo sa panimalay.

Sumala pang Dalena dili paigo ang certificate of incorporation nga gi-isyu sa SEC isip pagmatuod nga legal makapang- rekrut o modani og investors ang usa ka tawo o grupo.

Giawhag niya ang publiko nga kinahanglang mosusi gyud sa www.sec.gov.ph  Advisory Section kay didto nakalista ang mga legal ug dili legal nga mga kompanya sa dili pa sila mobubo og puhonan.

Mahimo sab mangutana pinaagi sa pagpadala og email pinaagi sa [email protected] aron masuta kun ang korporasyon adunay katungod nga magdani/mag-engganyo o motanyag og investments.

Giawhag sab nila ang publiko pagsumbong dayon diha sa ilang buhatan kung sila rekruton aning maong mga kompanyaha. (BANATNEWS)