P20 mil AstraZeneca vaccine gitagana para sa Central Visayas

CEBU, Philippines — Dunay gitaganang 20 mil ka doses sa AstraZeneca vaccine alang sa Central Visayas samtang dugang 12 mil ka doses na sab ka Sinovac vaccines ang mangabot aron ibakuna sa mga medical front liners dinhi sa Sugbo.

“We have been informed that we will be receiving a total of 20 thousand doses of AstraZeneca,” matud pa sa tigpamaba sa Department of Health-VII Dr. Mary Jean Loreche sa virtual presser kagahapon.

Matud pa nga kining AstraZenica vaccines gitagana para sa mga medical frontliners nga lapas na og 60-anyos. Wala pa hinuon mahibaw-i kun kanus-a kini maabot dinhi apan nasayran nga duna nay nangabot niini didto sa kaulohan. Ang Sinovac para lang gyud sa  nag-edad og 18 hangtud 59 anyos.

Sa pagkakaron, ang Cebu  nakadawat na og 14,680 doses sa Sinovac gikan sa kaulohan ug nagamit na ang 1,557 niini sa  mga health care workers sa Vicente Sotto Memorial Medical Center samtang ang ikaduhang batch sa nangabot nga Sinovac nga 7,480 doses giapud-apod na sa mga level 1, 2, ug 3 hospitals sa gobiyerno ug mga pribadong tambalanan.

Matud pa nga mga nabakunahan na, dunay 45  kanila ang nakasinati og ginagmay nga ‘adverse effects’ apan dili seryoso aron ikabalaka. —The Freeman/IBM