Road project sa balamban makatabang sa mga mag-uuma

CEBU, Philippines — Laing road concreting project ang gipaabot nga makumpleto sa usa sa mga lungsod sa Probinsya sa Sugbo diin makabenipisyo niini ang mga mag-uuma hilabina sa mga bukirang barangay.

Si Cebu Governor Gwendolyn Garcia maoy nangulo sa groundbreaking sa second phase sa six-kilometer provincial road gikan sa Barangay Poblacion ngadto sa Barangay Lamesa Lungsod Balamban niadtong Marso 4, 2021. Ang maong phase mao ang four-kilometer road stretch nga adunay sukod nga 6.1 meters nga gilapdon ug nine inches ang gibag-on nga kabahin sa six-kilometer provincial road project sa Capitol gikan sa Barangay Poblacion ngadto sa Barangay Lamesa.

Ang maong proyekto adunay kinatibuk-an nga P54.8 million nga pondo nga naglangkub  sa 11 ka barangay ,ang Vito, Singsing, Hingatmonan, Liki, Cabagdalan, Lamesa, Luka, Ginatilan, Cabasiangan, Bayong, ug Matun-ob.

Si Hingatmonan Barangay Captain Raymond Panulde nipadayag sa iyang kalipay sa maong proyekto nga makabenipisyo sa mga residente sa ilang dapit hilabina ang pag hatod sa ilang produkto sa agrikultura.

Atol sa kalihokan si Garcia niawhag sa mga residente nga nag puyo kilid sa dalan nga mogahin og espasyo alang sa road widening project.

“Hangyo nako ni kay gusto man ta ug nindot nga dan, asa man napadung, magdugay man ning kalsada kay ma-baga naman na,” matud sa gobernador base sa report sa Sugbo News ang gidumala nga news portal sa Probinsya sa Sugbo.  MEL (BANATNEWS)