6 ka drug-free brgy sa Danao nakadawat og p50 mil

CEBU, Philippines — Unom ka mga barangay sa syudad sa Danao ang nakadawat og P50mil gikan sa lokal nga kagamhanan human sila gideklarar nga drug-cleared barangay.

Ang maong mga barangay mao ang Dungga, Nangka, Licos, Cambubho, Baliang ug Quisol. Si Mayor Nito Durano mao ang personal nga nisuporta sa paghatag sa maong incentives sa unom ka barangay.

Nanawagan ang mayor ngadto sa tanang barangay sa ilang siyudad nga kanunay nga moabag sa komunidad alang sa kampanya pagpakibatok sa illegal nga drugas.

Gidasig usab niya ang katawhan nga motahu sa iyang buhatan o pinaagi sa ilang Public Information Office (PIO) kun ugaling dunay mamatikdan nga nalambigit sa illegal nga drugas ug iyang gipasalig nga magpabilin nga confidential ang mga tawo nga mopadangat og tahu sa ilang buhatan.

Sumala sa Danao city government facebook page nga nakapasar ang maong mga barangay human niagi sa "drug clearing operation" ug gideklarar nga "free from any illegal drug activities" sa oversight committee nga gipangulohan sa Philippine Drug Enforcement Agency (PDEA).

Ang proseso sa pagdeklarar kanila nga drug-cleared subay sa 14 ka parameters nga gi-set sa Dangerous Drugs Board (DDB) apil na niini nga dapat wala na silay pusher,user ug drug den nga identified ug adunay rehabilitation program sa mga drug surrenderer.

"Ang BADAC mao ang mu-assist sa mga law enforcement agencies niining drug-clearing operations; samtang ang mu-oversee sa tanang BADAC lakip na ang pag-atubang sa deliberation mao ang City Mayor’s Office pinaagi sa City Anti-Drug Abuse Office (CADAO) ug Strategic Management Support Office (SMSO)" matod sa Danao city government facebook page.

Aron ma mentinar ang ilang drug-cleared status padayon gihapon sila nga i-monitor.

Ang dakbayan sa Danao aduna nay 12 ka mga drug free barangays.

Samtang sa laing bahin, usa ka 21 anyos nga lalaki ang nasikop sa may sitio Panagdait, Barangay Kasambagan Dakbayan sa Sugbo, human nasakmitan ug ginadili nga drugas, Miyerkules sa gabii.

Ang nasikop naila nga si Michael Villaver kanhi piniriso nga taga Dakbayan sa Mandaue.

Nasakmit gikan sa maong dinakpan ang mga pinutos sa ginadili nga drugas nga mobalor ug dul-an sa 184mil ka pesos. —Rowena D. Capistrano/MEL (BANATNEWS)