CCTO padayon sa clamping operation, miawhag sa brgy nga moabag
CEBU, Philippines — Namatikdan sa Cebu City Transportation Office CCTO nga wa gihapon motagam ang mga nanag-iya og sakyanan ug pabilin gihapon sa pagparking diha sa mga kadalanan.
Gumikan niini subli nga nanawagan ang CCTO sa mga opisyales sa barangay nga mohimo usab og kooperasyon sa road clearing sanglit alang ra man usab kini sa kahapsay sa ilang dapit.
“Among gibalikan tungod sa daghan gihapong reklamo kabahin aning night illegal parking, murag wla pajud kini sila matagam nga gioperasyonan naman unta ni sila sa niaging semana,” tipik sa gipadala nga statement sa CCTO.
Miabot ngadto sa 53 ka mga sakyanan ang na-clamp sa CCTO sa miaging adlaw sa pipila ka lugar nga ilang gibalik sa pag-operate.
Pipila ka dalan nga ilang gioperasyonan og balik mao ang Asunsion, Tangkongan, San.Vicente, Urgello, M.Oyson, Aznar Road, Encarnacion, ug Visitacion sa Barangay Sambag 2.
Lakip usab sa operasyon ang Ariola St., ug Alcantara St. sa Barangay Sambag 1.
Samtang sa laing bahin pormal na nga gihimong discipline zone ang barangay Tabunok, Dakbayan sa Talisay sugod kagahapong adlawa.
Si Police Lt. Col. Gerard Ace Pelare, pangu sa Talisay City Police Station nibutyag nga hagit nila nga himoong disiplinado ang mga tawo nga naa sa usa ka busy kaayo nga lugar sa Talisay.
Lakip sa ilang ipatuman mao ang lokal ug nasudnong balaod aron madisiplina ang katawhan sama sa no jay walking, no smoking, no littering ug uban pa.
Ang maong programa, suportado sa ilang direktor sa Police Regional Office (PRO)7 nga si Brigadier General Ronnie Montejo, Mayor Gerald Anthony “Samsam” Gullas Jr. ingon man sa City Peace and Advisory Council, Cyril Velasco. —Gabriel C. Bonjoc/MEL (BANATNEWS)
- Latest
