Labella mipahimangno kalabot sa paglikay sa sunog
CEBU, Philippines — Gipahinumduman ni Mayor Edgardo Labella ang katawhan nga kanunay magmatngon aron malikay sa sunog nonot sa kasaulogan sa fire prevention month.
Ang mayor mipaambit usab sa iyang nabasa sa Philippine Information Agency ug Bureau of Fire Protection nga mga tips unsaon nga makalikay sa sunog.
Lakip na niini ang pag-check sa mga LPG tank ug pagpalong sa tanang electrical equipment o pag unplug sa mga appliances kon dili gamiton aron malikayan ang pagka-overload sa electrical circuits.
Likayan usab ang pagpanigarilyo sulod sa balay ug dili ipataka og labay ang mga upos niini.
Kinahanglan usab nga planohan daan ang emergency ug evacuation plan sa balay aron magpabiling kalmado panahon sa fire emergency.
“Give us these fire prevention tips to keep in mind alang sa kaluwasan sa sunog ilabina sa atong tagsa-tagsa ka panimalay,”nagkanayon ang mayor.
Gipahinumdoman usab sa mayor ang katawhan nga motawag dayon sa otoridad panahon sa emerhensya.
“Aduna sab ta'y Emergency Hotline Number sa Cebu City Fire Station kon simbako makabati og sunog sa silingan o sa kaugalingong panimalay. Motawag lang sa 166 ug sultihan dayon ang emergency operator sa location aron madali pag-adto sa atong responders,” dugang pa sa mayor. —MEL (BANATNEWS)
- Latest
