Nigamit og mga gwapong hulagway aron makailad
CEBU, Philippines — Usa ka 23 anyos nga lalaki ang gidakop human gireklamong nanghulga nga i-post sa social media ang mga naghubo nga hulagway sa babayeng iyang nahimong uyab pinaagi sa pakig-chat sa dihang kini buwagan sa babaye.
Si Eva (dili tinuod nga pangalan) 19-anyos kauban ang inahan niini nga taga Dakbayan sa Talisay nidangop sa kapulisan sa maong dakbayan ug misumbong bahin sa hulga sa suspek nga si Robert Villegas Debulosan , 23, taga Canbanyug, lungsod sa Argao.
Tungod niini si Police Lt. Col. Gerard Ace Pelare, pangu sa Talisay City Police Station nakigalayon sa Argao Police hinungdan nga gikuyogan nila ang biktima didto ug gidakop ang suspetsado.
Sa pagrekisa sa kapulisan nakuha nila ang cellphone ug motorsiklo sa suspetsado ingon man tulo ka gagmay nga paketeng gidudahang sa shabu.
Si Pelare nagkanayon nga dili lang diay si Eva ang nabiktima sa suspek tungod kay daghan pang mga hulagway sa mga batan-ong babayeng naghubo ang nakita diha sa iyang cellphone.
Matud pa niya nga modus sa suspek ang paggamit og peke nga accounts niini ug magbutang kini og mga gwapong hulagway sa mga lalaki sa iyang “profile picture” aron makadani og mga babaye.
Nagkanayon si Pelare nga 17 ka accounts ang gigamit sa suspek sa iyang social media.
Ang lain-lain nga gwapong hulagway ni Debulosan maoy giingong iyang pangdani sa mga babaye nga kadugayan iyang panguyaban pinaagi sa pakig-chat. Hangtud nga kung masuod na sila mangayo kini og mga hubo nga hulagway sa mga babaye nga mao sab iyang gigamit sa pag blackmail kung dili makighilawas kaniya.
Ang suspek sa dihang gikuhaan og pamahayag mihimakak sa pasangil nga siya tiggamitan og illegal nga drugas.
Apan niangkon nga ‘adik’ lang siya sa gugma ug dili niya madawat nga buwagan sa iyang karelasyon.
Gisusi sab sa kapolisan ang report nga dunay biktima ang suspek nga naghikog tungod sa iyang pagpang blackmail.
Giandam na karon sa kapulisan ang kasong paglapas sa R.A. 9995 (Anti-Photo and Video Voyeurism Act of 2009). – Rowena D. Capistrano/IBM (BANATNEWS)
- Latest