Niñal: Bisan walay supply sa krudo padayon ang pagkolekta sa basura

CEBU, Philippines — Ang Barangay San Nicolas Proper padayon gihapon kini sa pagpangolekta sa basura bisan og wala silay supply sa krudo gikan sa kagamhanan sa Dakbayan sa Sugbo sukad niadong Pebrero 20, 2021

Kini ang gibutyag ni Kapitan Clifford Jude Niñal.

Matud ni Niñal nga gibabagan sila sa Barangay Affairs Office tungod kay giingong ang sakyanan lang sa siyudad ang hatagan og supply sa krudo.

Ang ilang truck sa barangay maoy mokarga sa mga basura sa merkado sa Taboan  diin nasakop kini sa iyang area of responsibility.

Si Niñal nagkanayon nga kong walay krudo dili usab sila makakolekta sa basura apan mangita sila og pamaagi niini tungod kay kong dili nila mahakot ang mga basura sila ra gihapon ang mag-antos sa mga hugaw. Gibutyag ni Niñal nga nangutang siya sa iyang mga higala aron makapalit og krudo aron padayon gihapon nga makolekta ang mga basura sa ilang barangay.

Matud usab ni Niñal nga nitugot na unta si Vice Mayor Michael Rama ug pangulo sa Department of Public Service Atty. Jigo Dacua nga hatagan sila og krudo apan ang pangulo sa BAO giingong maoy nibabag.

Ang Banat News napakyas sa pagkuha sa habig sa BAO tungod  kay adlaw’ng Domingo kagahapon ug sirado ang maong buhatan. BDB (BANATNEWS)