88 ka sakyanan sa Cebu City na-clamp

Cebu, Philippines — Ang Cebu City Transportation Office nakadawat og daghang reklamo kabahin sa mga “night illegal parking” diin kalapasan kini sa city ordinance 2004 hinungdan nga nisuroy sila diha sa pipila ka dapit sa siyudad.

Nasayran nga 19 ka lugar ang gibisita sa mga sakop sa CCTO kagahapon sa kadlawon diin 88 ka sakyanan ang ilang na-clamp.

Ang maong mga sakyanan giingong nag-night illegal parking diha sa Caimito Street sa Barangay Lorega, Gonzales Compound sa Kamputhaw, kilid sa Guadalupe Church, Guadalajara Street sa Barangay Guadalupe, Ma. Therese Guadalupe.

Lakip diha sa likod sa Casimera Salvador Extension, Katipunan Street, Felina Village sa Barangay Tisa, Guadalupe Village, Libra Street Buhisan, Ubos Puso Cabreros, Alumnos, Villa San Antonio, likod sa Shopwise Cabreros, S.D Tecson Street sa Mambaling, Basak San Nicolas ug Doña Esperanza sa Punta Princesa.

Ang CCTO nihangyo sa publiko nga itarong og parking ang mga sakyanana aron dili kini ma-clamp. Nasayran nga P1,500 ang multa sa ma-clamp nga sakyanan.

Sa laing bahin, naglaom ang pipila ka mga kawani sa kagamhanan sa Dakbayan sa Mandaue nga ilang  makuha ang taas  nga compliance rating gikan sa Department of Interior and Local Government (DILG) alang sa ilang gihimo nga road clearing  operation. Pebrero 23, 2021 gihimo ang final validation sa road clearing operation nga gipahigayon sa mga personnel sa DILG sa Dakbayan sa Sugbo.

Si Johnjoan Mende, bag-ong direktor sa DILG sa Dakbayan sa Mandaue nagkanayon nga sa ilang gipahigayon nga validation maayo ang natala sa kinatibuk-an.

Matud ni Mende  nga pipila lang ang mga namatikdan nga obstruction nga ilang natala nga naglakip sa wala makolekta nga mga basura, debris gikan sa nagpadayon nga construction,  illegal parking nga motorsiklo ug ingon man ang mga removable extension o estraktura nga gigamit sa patigayon

Si Ernersto  Bongo, operations head sa Mandaue City Enforcement  Unit (MCEU)  nagtuo nga ilang maangkon ang taas nga rating sa ilang road clearing operation. — Romeo T. Limpangog