Klase-klaseng armas nasakmit
Cebu, Philippines — Dili mominos sa napulo ka mga klase-klase armas ug usa ka granada ang nasakmit sa kapulisan sa Dakbayan sa Toledo gikan sa usa ka 51-anyos nga lalaki sa may Upper Maarat, Barangay Matab-ang Huwebes sa gabii.
Ang nasikop mao si Fernando Sigue kinsa giila nga Top. 1 Most Wanted sa Dakbayan. Nangulo sa pagpatuman sa Search Warrant mao ang hepe sa Toledo City Police Station Police Lt. Col. Junnel Caadlawon.
Ang maong dinakpan giingong kanunay ireklamo sa mga tawo tungod sa kanunay nga pagpasalba sa iyang armas.
Sumala pa ni Caadlawon, giingong nasikop niadtong 2015 si Sigue tungod sa kasong pagpatay sa usa ka polis niadtong tuig 2011.
Kasong paghupot og explosive device, ug dili lisensyadong mga armas ang gipasaka batok sa dinakpan.
Sa pikas bahin, nadakpan sab tungod sa dili lisensyadong mga armas ang usa ka residente sa Purok 2, San Roque Barangay Lamac, Lungsod sa Consolacion sa samang adlaw. Si Police Major Verniño Noserale, hepe sa Consolacion Police Station miila sa ilang dinakpan nga mao si Carl Sam Labrador Pepito, 30.
Matud pa ni Noserale nga si Judge Mercedita Dadole Ygnacio, presiding judge sa Regional Trial Court (RTC) 7 sa Branch 28 sa Dakbayan sa Mandaue maoy niluwat sa search warrant tungod sa paghupot og armas batok sa suspek.
Nakuha gikan sa dinakpan ang usa ka sling bag, usa kalibre .45 ug usa ka magazine niini.— Romeo T. Limpangog (BANAT NEWS)
- Latest
