Kapolisan blangko pa sa pagpatay sa Muslim affairs leader sa Lapu-lapu

CEBU, Philippines — Blangko gihapon ang  kapolisan  sa Lapu-Lapu  City Police Office (LCPO) alang  sa pag-ila sa riding in tandem nga maoy nagpusil patay sa giilang lider sa Lapu-lapu Muslims Affairs.                                    

Padayon pa nga gisusi sa kapolisan ang motibo sa pagpusil patay kang Abdulah Pabilla nga taga Barangay Pajac, sa maong dakbayan.            

Si  Police Colonel Arnel  Banzon, LCPO  director,  miingon nga nagtinguha karon sila sa pagpakighinabi sa mga sakop  sa pamilya  sa pagsuta kon aduna ba kini nasinati nga mga hulga sa iyang iyang kinabuhi.      

“Nagpa-interview ta sa pamilya, basin naa sila’y nadungog nga dunay threat sa iyaha,” matud pa ni Colonel Banzon.                 

Dugang pa ni Banzon nga gisusi usab nila ang mga CCTV camera sa city hall compound sa pamasin nga makatabang sa pag-ila sa mga mamumuno.                        

Samtang si Mayor Junard Ahong Chan sa iyang bahin miingon nga iyang gimandoan ang kapolisan sa paghimo og lawom nga imbestigasyon labot sa maong hitabo.                    

“I am directing Colonel Banzon to conduct a thorough investigation. Leave no stone unturned and serve justice to the family of Abdullah,” suma pa ni Mayor Chan.               

Gitug-an sa mayor nga si Pabilla mao ang nagsilbi nga pangulo sa  Muslim  Affairs sukad  pa sa panahon ni kanhi  Mayor ug karon Kongresista Paz  Radaza.                     

Giangkon ni  Mayor  Chan nga dakong kawad-on sa iyang administrasyon ang kamatayon ni Pabilla sanglit  naghupot man kini og mahinungdanon nga kaakohan sa paghiusa sa muslim communities sa dakbayan. MEL (BANATNEWS)