Pag-work from home ni Labella walay sayop

CEBU, Philippines — Gitataw ni Department of Interior and Local Government Undersecretary Epimaco Densing III nga walay sayop kun ang usa ka opisyal sa gobiyerno mag -work from home kun kini adunay balidong rason sama sa sakit nga gihambin.

Pamahayag kini Densing kalabot sa sitwasyon ni Cebu City Mayor Edgardo Labella nga nag-work from home ra sud na sa pipila ka adlaw human kini nakagawas sa tambalanan tungod sa ear infection.

Nagkanayon si Bensing nga gikinahanglan lang gyud nga  duna gyuy gibuhat ang mayor  sama sa pagdangat og mga kamandoan.

Nasayran nga padayon gihapon sa pag-work from home si Labella gumikan kay wa pa siya tugti sa iyang doktor nga mobalik sa opisina bisan ug mi-arang arang na ang iyang kahimtang gumikan sa ear infection.

Sa unang pamahayag ni  Labella, dili pa matino kun kanus-a siya makabalik sa opisina ilabi na karon nga dunay ubang trabahante sa city hall ang nataptan sa COVID19.

Giklaro hinuon sa mayor nga bisan naka-work from home siya, wala niya pasagdi ang iyang importanteng gimbuhaton sama sa pagpadangat sa basic services sa katawhan.

Suma pa niya nga lapad ang iyang pagkonektar  sa iyang mga department heads hinungdan nga wala mabiyai niini ang mga programa sa siyudad. 

Kahinumdoman nga sa miaging buwan human siya nakaistar sa tambalanan sulod sa pipila ka adlaw, gitambagan siya sa iyang doktor nga mas maayo magpuyo lang una sa iyang panimalay aron makabaton og saktong pahuway.

Ang pagka-expose niya sa daghang tawo maoy usa sa nakapa-trigger sa iyang ear infection. Hinuon tungod sa naangkon niya nga sakit, magbinantayon na siya kanunay ug mobuhat og dugang pamaagi nga makatrabaho gihapon nga dili maapektohan ang iyang panglawas.

Niabot usab sa punto nga giintriga siya sa iyang mga kritiko nga matud pa na-coma siya.

Giklaro hinuon ni Labella nga iyaha na nga gipasaylo  ang mga tawo nga nagmugna og estorya bahin kaniya samtang siya nasakit.— Rowena Capistrano/IBM (BANATNEWS)