Kapitan Niñal: Paghipos sa mga homeless angayan seryosohon

CEBU, Philippines — Ang kapitan sa San Nicolas Proper nga si Clifford Jude Niñal naglaum nga seryosohon sa kagamhanan sa Dakbayan sa Sugbo ang pag “rescue” sa mga kabus nga walay kapuy-an.

Giasoy ni Niñal nga ang "naluwas" nga mga kanhi namuyo sa kadalanan pinaagi sa Prevention Restoration Order Beautification and Enhancement (PROBE) sa Siyudad sa Sugbo kaniadtong Disyembre ningbalik na usab sa iyang barangay.

“Nidaghan na pud ning mga homeless diri sa amoa karon, maglisod na gyud ko ani, unsa akong ipakaon ug asa papuy-on,” suma pa ni Niñal.

Nakadugang sa gikabalak-an ni Niñal mao ang pagtaas na pud sa kaso sa Covid 19 sa Siyudad.

“Tinud-on na unta ni nila, katong pag last gani nga gipanguha ning mga homeless diri, nagpatabang sa akoa kay wa silay kaon didto sa Labangon (where the City’s Department of Social Welfare is, gipadalhan pa namog gamit didto,” dugang ni Niñal.

Sa labing bag-o nga monitoring, adunay tulo ka mga pamilya nga nagpuyo sa kadalanan nga nagsuroy sa San Nicolas nga nagka- Covid 19.

Gawas nga natakdan sa Covid, giingon ni Niñal, adunay nagpadayon nga konstruksyon sa gym diin mao usab gipasilungan sa mga kabus ug walay mga panimalay hinungdan nga medyo peligro ang ilang pagpuyo didto.

Samtang adunay bag-ong nawong sa mga nanimuyo sa kadalanan sa palibot sa barangay nga nakapasamot sa daghang basura ug kahugaw sa palibot sa Tabuan Market. MEL (BANATNEWS)