Magtiayon napalgang patay
CEBU, Philippines — Wala nay kinabuhi nga nakit-an ang magtiayon sulod sa giabangan nilang jewelry repair shop sa may Barangay Poblacion, Dakbayan sa Lapu-Lapu kagahapon sa hapon.
Ang magtiayong sila si Jovanie Capangpangan, 45, ug Michelle Capangpangan, 38, nadiskubrehan human nga ang ilang mga kabanay ug mga anak pugsanong mipaguba sa ilang shop kay tulo na sila ka adlaw nga wala na niuli sa ilang panimalay sa Poblacion sa lungsod sa Consolacion.
Ang igsuon ni Jovanie, nitug-an tulo na ka adlaw wala nila igkita ang duha mao nga gipangita na sila sa ilang mga anak. Hinungdan nidesider silang susihon ang shop sa magtiayon.
Nasuta nila nga nag-andar ang aircon sa shop apan bisan giunsa nila pagsangpit walay nitubag hinungdan nagpatabang sila sa usa ka panday aron ablihan ang shop sa managtiayon.
Didto nakita ang duha nga nagsugod na og kadugta ang ilang mga patay nga lawas.
Matud pa ni Police Master Sergeant Jack Lord Pogoy ang imbestigador sa maong kaso ipaubos pa nila sa autopsy ang mga lawas aron masuta gayud nila ang hinungdan sa ilang kamatayon.
Apan base sa inisyal nilang imbestigasyon sa kamatayon sa magtiayon posible kining usa ka kaso sa parricide o crime of passion. Base sa pamahayag sa pamilya sa lalaki, nagaway-away ang magtiayon tungod sa 3rd party (kabit).
Ang kapulisan adunay nadiskobre nga suicide letter gikan sa namatay nga bana nga nakapalig-on sa motibong ilang gisuspetsahan.
Dako ang pagtuo sa kapolisan nga ang babaye unang gipatay sa lalaki pinaagi sa pagtuok, nakita sab ang lalaki adunay mga kinamrasan timailhang nisukol ang babaye. Ang lalaking gituohang miinom og makahilong kemikal.— IBM (BANATNEWS)
- Latest