Nars gitulis, usa sa mga suspek nadakpan
CEBU, Philippines — Usa ka nars ang gitulis sa duha ka lalaking nagmotorsiklo diha sa Barangay Tungkop, lungsod sa Minglanilla niadtong Biyernes sa gabie.
Si Sharee Ann Gargar, 35, nagpuyo sa nahisgutang lugar naabtan sa duha ka tulisan sa karsada. Ang backrider maoy nition og armas sa dihang gikuha iyang mga gamit.
Nakuha gikan sa biktima ang iyang back pack nga adunay sulod pitakang adunay P3 mil salapi , mga IDs ug ang iyang mga ATM cards.
Nagpakitabang sa kapulisan si Gargar hinungdan nga nipahigayon kini og hot pursuit operation ang mga otoridad.
Si Police Major William Homoc, pangu sa kapulisan sa Dakbayan sa Talisay nagkanayon nga nadakpan si Christian Jess Lobero alyas Hapon, 20 anyos nga taga Poblacion, Ward 1 sa nahisgutang lungsod.
Samtang ang iyang kauban nga nakasibat mao si Christopher Gica, 34, taga Barangay Inayagan, Dakbayan sa Naga.
Matud pa ni Homoc nga ang biktima positibong miila kang Lobero nga maoy mition kaniya og armas. Narekuber sa kapulisan ang mga gamit sa biktima ingon man ang .22 nga armas nga adunay duha ka bala ug duha ka medium nga pakite sa shabu. Ang dinakpan gibalhug sa bilangguan nga gikatakdang pasakaan og kaso.— IBM (BANATNEWS)
- Latest