COVID-19 update: City administrador positibo sa virus

CEBU, Philippines — Nagpositibo  sa coronavirus disease ang city administrator sa Dakbayan sa Lapu-Lapu nga si Atty. Danilo Almendras matud pang Mayor Junard   Chan atol sa press briefing  niadtong miaging Biyernes Pebrero 19, 2021.

Matud pa niya nagpaubos sa RT-PCR test si Almendras human nga kini giubo, nigawas ang resulta Pebrero 17, 2021 nga nagkompirman nga positibo kini sa  maong  virus ug naa karon sa us aka tambalanan.

Tungod niini gipaubos sab og swab test ang mga sakop ni Almendras  samtang giawhag sa mayor ang tanang na-close contact ni Almendras nga boluntaryong mag self-isolation.

Sa pikas bahin, subling gibuksan sa Dakbayan  sa  Mandaue ang duha ka isolation units niini tungod sa pagsaka  og balik sa mga kaso sa Covid-19 sa siyudad.

Niadtong Pebrero 18, 2021 dunay 60 ka bag-ong kaso apan sagad kanila way sintomas o ba kaha mild symptoms lang nga di kinahanglang dad-on og tambalanan apan kinahanglang mabuwag sa uban aron dili makapanakod.

Ang Norkis Park isolation unit gibuksan pagbalik niadtong Pebrero 2, 2021 ug karon duna nay 71 ka mga pasyente sa Covid-19, ang maong pasilidad may kapasidad lang nga 79 ka mga pasyente.

Hinuon gibutyag ni Dr.  Ligaya Lakambini Dargantes  nga mahimo pa kining padak-an gamit na ang portable beds hangtud sa 90  ka mga pasyente.

Aron makapangandam ilang i-reactivate ang laing duha ka isolation units nga naglakip sa Mandaue City Isolation Unit sa Mandaue City Central Schools ug ang gitukod sa karaang North Bus Terminal sa Barangay  Subangdaku kun mapuno na  ang Norkis Park Isolation Unit.

Samtang ang Dakbayan sa Talisay, nakatala sab og dugang 29 ka bag-ong kaso niadtong Pebrero 18 ning tuiga.  Hinuon 19 sab ka tawo ang nakarekuber sa maong virus.

Sa bag-ong nagpositibo, 10 anyos nga gikan sa Barangay Pooc ang pinakabata. Samtang 84 anyos ang pinaka edaran nga gikan sa Barangay Lawaan 2.

Ang kinatibuk-ang kaso naa na sa 1,517 samtang 1,212 ang nangaayo Adunay 109 nga namatay samtang naa sab sa 196 ang aktibong kaso.

Sa pikas bahin, padayon ang pagsaka sa mga kaso diha sa Siyudad sa Sugbo human dugang 192 ang natala niadtong adlaw’ng Biyernes, Pebrero 19, 2021 sumala pa sa DOH-7 bulletin.

Ang Cebu City duna nay 15,776 total cases ug naa sa 2,897 ang active cases.

Hinoon 157 ang dugang nangaayo  ug karon 12,158 na ang kinatibuk-ang nakalingkawas sa virus apan dunay duha nga nakalas anang adlawa ug nahimo na kini karong 721.— Gabriel Bonjoc, Decemay P. Padilla /IBM (BANATNEWS)