Mga pari boluntaryong nagpa-swab test

CEBU, Philippines — Boluntaryo nga nipaubos sa swab test ang mga pari sa Alliance of Two Hearts Parish, Banawa ning Dakbayan sa Sugbo, kagahapon sa buntag sa pribado nga tambalanan sa Dakbayan sa Mandaue.

Kini human usa sa mga pari nila boluntaryo nga nagpa-admit niadtong Pebrero 17, 2021 sa pribado nga tambalanan sa Dakbayan sa Sugbo tungod sa nasinati  nga ubo og hilanat.

Base sa social media page sa Parish Of The Alliance Of Two Hearts, Banawa, malipayon usab nilang gipahibalo ang health bulletin sa maong pari nga mi-arang arang na ang kahimtang ug niawhag sa katawhan nga ilakip sa pag-ampo alang sa dinalian nga kaayohan niini.

Samtang gipahibalo sa kaparian nga gipa-ubos na usab nila sa home quarantine ang mga nagtrabaho sa kumbento, gawas lamang sa mga office staff kay wala man silay kontak sa maong pari.

Gipaniguro sa mga pari uban sa pag-abag sa guest priest ug parish ministries, ang serbisyo sa simbahan magpabilin nga normal ug padayon nga ipatuman ang tanang health protocols alang sa seguridad sa tanan ug sa mga manimbahay.

Samtang ang Commission on the Laity sa Archdiocese of Cebu uban sa nagkadaiyang grupo nagpahigayon ug prayer groups alang sa prayer brigade para sa healing ug fast recovery ni Archbishop Jose Palma, kinsa nalandig usab sa tambalanan tungod kay positibo sa COVID-19 ug sa mga nasakit tungod sa maong balatian. —MEL (BANATNEWS)