Konsehal Marcial Ycong sa Lapu-Lapu mitaliwan na

CEBU, Philippines — Mipadangat sa iyang kasubo si Mayor Junard “Ahong” Chan sa Dakbayan sa Lapu-lapu sa kalit nga pagtaliwan ni kanhi Vice Mayor ug karon konsehal Marcial Ycong.

Matud pa ni Chan, iyang mahinumduman si Ycong nga usa ka tawo nga adunay integridad, buotan, matinabangon ug tinuoray nga higala.

Tulo ka higayon nga nahimong vice mayor, kanhi konsehal sa Pajo nga adunay dako kaayo nga kontribusyon sa barangay ug daghan usab og natabangan si Ycong.

Gitug-an ni Chan, dili siya makalimot sa dihang midagan siya pagka kapitan sa Barangay Pajo ug nagtinguha usab si Ycong pagdagan sa maong position apan wala kini modayon sa dihang nasayran nga siya ang magpapili.

Gidugang sa mayor nga wala modagan si Ycong, sa barangay kay girespeto niini ang ilang panaghigalaay.

Si Mayor Chan nagkanayon nga dili lang ang pamilya ni Ycong ang nagbangutan kung dili lakip usab siya ug ang mga oponganon.

Panghinaut sa mayor ang kapahulayan nga dayon sa maong konsehal nga ila unyang kamingawan. —MEL (BANATNEWS)