Pag-instalar og streamers alang sa 500th year celebration gitugot sa konseho

CEBU, Philippines — Ang Cebu City Council mitugot sa Archdiocese of Cebu nga mo-instalar og streamers ug banners subay na sa 500th year celebration of Christianity sa nasud dinhi sa siyudad.

Samtang nihukom ang konseho sa siyudad nga dili na pagastohon ang Archdiocese pag-instalar sa maong mga streamers.

Si Konsehal Joel Garganera mi-sponsor og resolusyon labot niini nga gi-aprubahan sa City Council niadtong Miyerkules.

Matud ni Garganera, ang 500th year celebration of Christianity of Cebu dunay dakong impact sa culture ug identity ug angayan nga iselebrar.

Dugang sa Konsehal, ang installation sa historical banners magsilbi nga 'effortless' reminder sa publiko sa umaabot nga selebrasyon.

Gipasabot ni Garganera nga importante nga ang siyudad mo-initiate sa installation sa historical banners aron pag-promote sa maong kalihukan.

"Due to the limited restrictions of social gatherings during the COVID-19 pandemic where physical celebrations cannot be catered, the essence of the commemoration shall be present with the visual appearance of these banners", segun ni Garganera.

Kahinumduman sa miaging buwan, gikatahu nga ang kapulisan nagsugod na og pagpangandam aron pag-secure sa umaabot nga 500th anniversary celebration sa Christianity sa nasud nga mahitabo sa Sugbo karong buwan sa Abril.

Suma pa ni Cebu City Police Office Director Colonel Josefino Ligan nga makig-alayon sila sa kadagkuan sa Archdiocese of Cebu aron masuta unsa nga mga kalihukan ang magkinahanglan og security detail. —MEL (BANATNEWS)