Lapu-Lapu naglaom nga sugdan karong Marso ang vaccination

CEBU, Philippines — Gilauman sa kagamhanan sa Dakbayan sa Lapu-Lapu nga masugod na ang vaccination batok sa COVID-19 buwan sa Marso niining tuiga.

Ug sa Pebre 24, 2021 gikatakdang ipahigayon ang laing simulation exercise sa siyudad.

Si Mayor Junard Ahong Chan nibutyag nga mao kini ang gipahibalo sa ikaduha nga vaccination plan meeting nga gipahigayon sa niaging adlaw.

Si Chan nipatawag sa tanang buhatan nga nalambigit sa vaccination plan sa siyudad batok sa COVID-19.                         

Lakip sa nitambong sa tigom mao ang mga personnel sa City Health Department ug City Hospital, City Disaster Risk Reduction and Management Office (CDRRMO) ug opisyal sa Department of Health (DOH)-7.          

Si Dr. Mary Jean Loreche ug Dr. Socoro Entera, hepe sa Pathologist and Development Office sa DOH-7 ang lakip usab sa nitambong sa maong tigom.

Tumong sa maong tigom nga mapalambo pa ang himuon nga vaccination activity sa kagamhanan sa siyudad.

Atol usab sa tigom gipahibalo ni Chan ug Loreche nga sila ang mag-una sa pagpabakuna batok sa COVID-19 aron ipakita sa mga Oponganon nga luwas ang bakuna.                            

Subay niini, ang Lapu-Lapu City Health Department (LLCHD) anaa na sa 53 porsyento sa ilang gipahigayon nga profiling sa mga healthcare medical frontliners alang sa himuon nga COVID-19 vaccination program.

Si Mae Cheryll Tepait, national immunization nurse coordinator sa LLCHD nagkanayon nga ang siyudad nakapahigayon na sa pag-ila sa 2,969 ka healthcare medical frontliners kinsa mga empleyado sa public ug private institutions sa dakbayan.                           

Gibutyag ni Tepait nga ang 53 porsyento ka healthcare medical frontliners nga ilang nahimoan og profiling anaa lang sa 32 ngadto sa 35 porsyento ang gipahibalo alang sa immunization nga himuon. Dugang ni Tepait nga adunay niuyon sa maong mga frontliner apan adunay wala pa mohukom tungod kay nagpili kini og brand sa bakuna. — BDB (BANATNEWS)