Cebu City mobutang og budget sa NOAH complex
CEBU, Philippines — Ang kagamhanan sa Dakbayan sa Sugbo andam nga mobutang og budget alang sa NOAH complex base sa giduso nga proposal sa nagdumala niini.
Kini ang gibutyag ni Cebu City Mayor Edagaro Labella. Si Labella niluwat sa maong pamahayag human sa panawagan nga kinahanglang bisitahan ang kahimtang sa NOAH complex tungod kay giingong dili kini maayo isip isolation center.
Ang NOAH complex maoy dalhanan sa kadaghanan sa mga asymptomatic nga COVID-19 patients.
Matud ni Labella nga ang NOAH complex usa ka level 1 facility samtang ang Cebu City Quarantine Control Facility maoy level 2 ug adunay budget gikan sa lokal nga kagamhanan.
Si Labella nagkanayon nga dawaton niya ang proposal nga iduso sa nagdumala sa maong facility nga si kanhi konsehal Jocelyn Pesquera.
Ug andam usab siya nga modawat sa rekomendasyon sa nagdumala sa NOAH complex kong kinahanglan ba kini og supplemental budget.
Si Labella nipasalig usab nga andam siya nga mopuno sa mga panginahanglanon sa existing nga gihimo sa NOAH complex. —BDB (BANATNEWS)
- Latest