Palma positibo sa COVID-19

CEBU, Philippines — Gipahibalo kagahapong adlawa sa Artsidiyosisis sa Sugbo nga ang pangulo sa Simbahang Romano Katoliko sa Sugbo, Archbishop Jose Palma naigo karon sa coronavirus disease ug gidala sa usa ka pribado nga tambalanan.

Ang tigpamaba sa Archdiocese of Cebu nga si Msgr. Joseph Tan maoy nibuak sa maong balita buntag sa adlaw nga Biyernes.

 Matud pa ni Tan, pinaagi sa mensahe nga gipadala, ang Archdiocese of Cebu mopahibalo sa mga magtutuo nga ang Arsobispo, positibo sa Covid-19, Huwebes sa gabii.

Sumala pa ni Tan, ang arsobispo gi-admit sa Perpetual Succour Hospital samtang ang mga tawong nakasikit ug nakauban niini gipahibalo na usab bahin sa kahimtang niya aron sila mag self-isolation.

Dugang pa ni Tan, ang arsobispo anaa sa stable condition sulod sa pribado nga lawak sa maong tambalanan. Nakasinati lang kini og kakapoy, lakip ang gamay nga ubo.  Katapusan nga nipahigayon og Santos nga Misa si Palma diha sulod sa Archbishop Palace niadtong adlaw nga Miyerkules. Ang palasyo gipaubos na sa quarantine hasta ang mga nakauban ni Palma didto.

Sa pikas bahin, nakagawas na sa tambalanan si Talisay City Mayor Gerald Anthony “Samsam” Gullas Jr. niadtong miaging adlaw human sa pipila ka adlaw nga pagka-confine tungod  napositibo kini sa virus.

Apan siya nipili nga dili lang una mopauli sa ilahang panimay kay nabalaka gihapon kini nga makatakod sa iyang kabanay kay duna pay siyay gamay nga ubo.

Una niini, si Gullas nagpositibo sa corona virus disease ug nagpahospital human sa kasakit sa iyang tutonlan nga daw murag adunay bildo.

Si Gullas nadala sa tambalanan niadtong Pebrero 11 ug nakagawas sa Pebrero 18 ning tuiga. 

Matud pa ni Gullas nga iyang humanon ang iyang 14 ka adlaw nga kwarantina ayha siya mobalik sa iyang pamilya ug sa iyang trabaho.— Gabriel Bonjoc/IBM (BANATNEWS)