Ang MOD nagpahigayon og clearing diha sa Carbon Public Market

CEBU, Philippines — Nagpahigayon og major clearing ang Market Operations Division sa mga nakabalda sa agianan sa tawo diha sa Carbon Public Market.

Ang hepe sa MOD Irvin Cabales nihangyo sa ubang manindahay nga unta dili molapas sa ilang mga pwesto sa higayon nga mo-display kini sa ilang mga baligya.

Giingong adunay uban sa mga manindahay nga gidan-ok lang ang mga kahoy nga kahon hinungdan mga maglisod og agi ang mga tawo. Ang paghawan nila sa mga nagbabag diha sa kadalanan tipik kini sa ilang pagsanong sa road clearing program sa Department of Interior and Local Government (DILG).

Si Cabales wala kini mohatag sa gidaghanon sa mga manindahay nga ilang nasita diin uban niini ilang nabantay nga mobalik gihapon.

Giingong ang masakpan nga kanunayng nakalapas sa kamandoan posibleng dili na kini makatinda og balik.

Gipasabot ni Cabales nga importante usab ang paghawan sa agianan sa tawo aron mamentinar usab ang social distancing paglikay sa transmisyon sa COVID-19 ug hamugaway usab ang pagpangompra sa mga tawo.

Ang MOD istrikto kining nipatuman sa quarantine protocols diha sa kamerkadohan diin kanunay ang operasyon sa pagpanakop sa mga wala magsul-ob og facemask.

Ang mga nadakpan nga violators ipaubos kini sa seminar sa MOD kabahin sa ka importante sa pagtuman sa health protocols.

Ang MOD nagpadayon usab kini sa ilang programa nga pag-apod-apod og libreng facemask. —BDB (BANATNEWS)