Mga batang Lumad gihimakak nga gibansay aron himuong rebelde

CEBU, Philippines — Nagkita na ang abogado sa National Union of People’s Lawyer (NUPL)  sa pito ka mga dinakpan may kalabotan sa pagluwas sa kapolisan sa mga batang Lumad  human sa pila ka oras nga gibabagan ang iyang tinguhang makasulod sa Police Regional Office (PRO)-7.

Ang tigpamaba sa NUPL nga si Attorney King Perez miingon nga hangtud ning pagsuwat sa balita, wala pay kasong gipasaka batok sa pito nila ka kliyente.

“So far, after nearly 24- hours,ato na gyung nakita ang unom sa atong mga kliyente, gi house sila sa RSOG na holding center...amo na silang nahinabi, ug naa silay gi raise na concerns na atong i address in time,” si Perez nagkanayon sa mga tigbalita atol sa pagduaw niya sa PRO-7 kagahapon.

Matud niya, nagpaabot unta silang dunay mahitabong inquest proceedings kagahapon ilabi na nga walay warrant of arrest ang pagaresto kanila.

“We have to take note that there is a 36 hour period for them to file the charges, otherwise, they will be released if walay kiha,” dugang pang Perez.  Si Perez miingon nga upat ka oras silang gipapaabot niadtong adlaw nga Lunes apan wa gyud niya makita ang pito.

Child warriors

Sa pikas bahin, ang Save Our Schools (SOS) Network Cebu miinsister atol sa ilang gipatawag nga press conference nga dunay pagtugot sa mga ginikanan apan giingong gikuha sa mga polis ang mga dokumento bahin niini.

Giinsister nila kadto nga “raid” ang nahitabo ug dili “rescue operation” nga maoy gitug-an sa kapolisan. 

Matud ni Professor Regletto Imbong, SOS Network Cebu Convenor nga way kamatuoran ang pasangil sa kapolisan nga gigamit ang mga bata alang sa mga militanteng kalihokan.

Si Father Rogelio Bag-ao Jr., ang provincial superior of SVD Philippines Southern Province mihimakak sab nga ang maong mga batang Lumad gibansay diha sa SVD Retreat House aron himuong mga rebelde.

“Mukuyog ko sa pamaagi sa pagtudlo, Unique nga pagtudlo gigamit nila (teachers). Ang DepEd (Department of Education) nga curriculum gigamit pero lain ang pagtudlo (kay) emphasis on environment and farming… Wala sa among huna-huna ang NPA (New People’s Army) so on and so forth. All we did was the love for this people… isip usa ka Christian,” matud niya sa mga tigbalita.

Sa press conference sab nga gihimo sa National Commission Indigenous People (NCIP) kauban ang mga ginikanan sa mga batang Lumad, usa sa mga ginikanan miingon nga duna nay namatay nga ginikanan tungod sa kahasol pagpangita sa ilang anak nga kauban sa mga na-rescue.

Way pananghid

Gibarogan sab nila nga ilang unang pamahayag nga wala mananghid kanila nga dad-on dinhi sa Cebu ang ilang mga anak kay ang pasalig sa Davao City ra.  Laing ginikanan sab ang miingon nga wala makasabot ang ilang mga anak kun unsa nang parent’s consent.

Si NCIP Director Marlon Bosantog miingon nga tungod kay nidangop man sa kapolisan ang mga ginikanan aron mabawi ang ilang mga anak nga matud pa gidala dinhi sa Sugbo nga walay pananghid kanila makonsiderar gyud ang gihimo sa PNP nga rescue operation.

“Whatever term it is called, ang katotohanan po dyan, ang mga bata na yan ay na sa possession ng mga taong walang karapatang humawak sa mga bata na yan,and that ia a serious illegal detention, that is kidnapping,that is human trafficking considering that ang mga bata na ito ay nag travel from one place to another,” matud pang Bosantog.

Ang NICP maoy mopasaka og kaso batok sa pito ug posible sab maapil ang USC sa kaso kun mapamatud-an sa imbestigasyon nga duna silay kalabotan sa pag-detain sa mga batang Lumad.

Samtang ang tigpamaba sa Department of Social Welfare and Development-7 Leah Tagalo-Quintana nitug-an nga nakig-alayon sila sa Cebu City alang sa pagkuha og impormasyon may kalabutan sa maong hitabo.

Giklaro sab niya nga way kalabotan ang ilang buhatan sa maong rescue operation sanglit mga social workers sa siyudad ang nanguyog didto. —Rowena Capistrano/IBM