Asawa gipadamgo, banang gianod sa baha napalgan

CEBU, Philippines — Tungod sa pagpadamgo ngadto sa asawa kung asa iyang nahimutangan nakit-an ang patayng lawas sa usa ka lalaki  nga na-missing niadto pang adlaw nga Lunes human gikatahong gianod sa bul-og sa baha paglabang niini sa sapa kay moadto unta sa balay sa igagaw diha sa Sitio Abugon, Barangay Liki sa Lungsod sa Balamban.

Wala nay kinabuhi dihang nakit-an pagkasunod adlaw si Larry Taotjo, diha na sa  Barangay Nangka. Si Taotjo  taga Barangay Tag-amakan sa Lungsod sa Asturias.

Matud pa sa Balamban Police Station ang ig-agaw ni Taotjo nidangop kanila aron magpatabang pagpangita sa ig-agaw kay gianod kini sa tubig baha.

Daling nilusad og search and rescue operation ang kapolisan diha sa luygar hangtud sa ubos sa sapa apan wala kini makit-i anang adlawa.

Apan nianang pagkagabii, giingong gipadamgo sa namatay ang asawa kung diin makaplagan ang lawas niini.

Matud pa nga sa damgo sa ginang, giingong miingon kini nga naa ra sa ilawom sa tubig diin kini kataposang nakit-ang nitidlom makita ang iyang lawas.

Tuod man sa dihang gisawom kini sa mga nangita nakuha gyud gikan didto ang lawas niini.

Ang patay nga lawas ni Taotjo positibong giila sa pamilya niini. —IBM (BANATNEWS)