Pagpasiga sa poste, electrification project gihingusgan sa siyudad
CEBU, Philippines — Gihingosgan karon sa kagamhanan sa Siyudad sa Sugbo ang pagpasiga og balik sa mga poste sa suga ilabi na diha sa mga bukirang barangay.
Matud pa ni Konsehal Phillip Zafra nga sa maong pamaagi, dili na kuyaw ang kadalanan.
“Kung hayag na ang usa ka lugar, dili na makuyawan moagi ang atong mga kaigsounan. Kun duna ta’y mga poste nga wala na magsiga, kuhaa lang ang number sa poste ug ipadangat na dinhi sa atong buhatan,” suma pa ni Zafra.
Kaabag ni Zafra sa maong kampanya mao ang Department of Public Services (DPS) ug ubay-ubay na ang ilang naserbisyohan.
Gawas sa maong programa gihingosgan usab sa siyudad ang electrification project ilabi na sa mga lagyo nga lugar.
Nasayran nga duna gihapoy mga lugar ilabi na sa kabukiran ang wala pa gyud naabtan og linya sa kuryente.
Suma pa ni Zafra nga naningkamot gyud ang kagamhanan aron masudlan og linya sa kuryente ang maong mga dapit.
Lakip sa unang nakapahimulos sa proyekto ang Sitio Kadianoy, Barangay Sapangdaku. MEL (BANATNEWS)
- Latest
