Gituhuang mga miyembro sa MNLF nga nagpatuong sundawo gidakop

CEBU, Philippines — Gidakop sa kapolisan sa Lapu-Lapu City Police Office (LCPO) ang 12 ka tawo nga gituhuang miyembro sa Moro National Liberation Front (MNLF) nga nag-uniporme usab og susama sa usa ka tinuod nga sundalo.         

Gipangatarungan sa 12 ka mga dinakpan nga ma-hire sila nga mga military sa higayon nga mahingpit na nga ma-establisar ang Bangsa Moro Autonomous government sa Mindanao.                                  

Si Police Lieutenant Colonel Resty Santos, deputy director for administration sa LCPO miingon nga unang nadakpan ang duha nga milabay sa checkpoint sa Barangay Punta Ingaño nga nagsakay og motorsiklo nga walay helmet ug walay driver's license.                                      

Nisunod ang napulo nga pulos nag-uniporme nga adunay mga patches ug insegnia nga nagtinguha pag-rescue sa duha nila ka mga kauban nga nadakpan.                                 

Nasuta sa kapolisan nga dili sila tinuod nga mga sundalo hinungdan nga gidakop.             

Gilla ang unang nadakpan nga sila si John Sacay Bregildo, 23, ug April John Dumanyag de la Serna, 21, nga pulos nagpuyo sa Barangay Basak sa maong dakbayan.

Ang laing napulo nga nadakpan mao sila si Lennard Magsanay Gador, 44; Jayson Garcia, 32; Juvy Anoos Banggos, 52; Arniel Verallo, 30; Bobby Rosales, 43; Kenneth Magsanay Gador, 48; Brigeldo Sacay, 21; Junard Tamala Pesiao, 39; Epifanio Alerta Sacay,41 ; ug Jose Arnold Bayadog Fabellar, 50                       

Si Mayor Junard Ahong Chan mitug-an nga iyang nasayran nga ang maong mga tawo magpahigayon og formation sa Barangay Mactan nga daw tinuod gayod nga mga sundalo.                               

Kasong pagmaneho nga walay lisensiya ug walay helmet ang gi-andam sa kapolisan batok sa duha nga unang dinakpan. Samtang laing kaso ipasaka batok sa napulo ka dinakpan tungod sa ilang pagsul-ob og uniporme sa sundawo.— MEL (BANATNEWS)