Lalaki patay human madasmagi og motor sa Bogo

CEBU, Philippines — Patay ang usa ka 52 anyos nga lalaki nga naglakaw human nadasmagan og motorsiklo diha sa dalan national sa sitio Casia, Barangay Lapas Dakbayan sa Bogo niadtong Domingo sa gabii.

Si Police Staff Master Sergeant Jerry Dela Cruz, imbestigador sa traffic section sa Bogo City Police Station miila sa namatay nga mao si Renato Dequino, minyo nga nagpuyo sa Purok Saging, Barangay Lapas sa maong dakbayan.

Suma pa ni Dela Cruz nga naglakaw taliwala sa dalan si Dequino dihang kalit nga mibangga kaniya ang motor nga gimaneho ni Marlex Pedrano Malinao, 33 anyos nga nagpuyo usab sa maong dapit. Gumikan sa kusog nga impact sa pagdasmag ang biktima nalamba sa sementadong karsada ug si Malinao nga wala magsul-ob og helmet ang napantok usab iyang ulo sa pagtugpa niini sa karsada.

Si Dela Cruz miingon nga ang duha dali nga gidala ngadto sa Bogo Provincial Hospital ug human sa paghatag og pasiuna nga pagtambal dali silang gibalhin sa Vicente Sotto Memorial Medical Center apan pagka Lunes sa kaadlawon namatay ang biktima nga si Dequino.

Samtang si Malinao padayon pa nga giatiman sa mga doktor sa VSMMC samtang pasakaan siya og kaso nga reckless imprudence resulting to homicide. —MEL (BANATNEWS)