DOH-7: COVID-19 sa Cebu City kontrolado pa gihapon
CEBU, Philippines — Dunay gibanabanang 140 mil ka molupyo gikan sa 27 ka barangay sa Dakbayan sa Mandaue ang unang makadawat og bakuna sa coronavirus disease 2019 gikan sa nasudnong kagamhanan sumala pang Subangdaku Barangay Kapitan Ernie Manatad, ang Federation President sa Association of Barangay Councils sa maong dakbayan.
Si Manatad kinsa mao sab ang chairman sa Mandaue City COVID 19 Vaccine Board miingon nga ang ilang lista pinasubay kini sa national governments guidelines kun kinsa ang prayoridad sa bakuna sama sa mga health workers, frontliners, kabus, senior citizen ug uniformed personnel.
Si Atty. John Eddu Ibañez, executive secretary ni Mayor Jonas Cortes miingon nga ang dakbayan adunay 362,700 nga populasyon base sa 2015 nga census.
Ang dakbayan migahin og P200 milyones pagpalit og bakuna alang
sa mga molupyo sa dakbayan.
Si Manatad miingon nga magpatabang sila sa Department of Health (DOH) kun asa makapalit og bakuna. Nasayran nga ang Mandaue Chamber of Commerce and Industry niabag na sab pagpangita og sa direktang mapalitan sa siyudad.—Romeo T. Limpangog/IBM
Covid-19 nga dunay sintomas dili gyud lalim —Mayor Gullas
Si Talisay City Mayor Gerald Anthony “Samsam” Gullas Jr. kinsa napositibo sa coronavirus miangkon nga naglisod gyud kaayo siya sa iyang gipamati karon sa lawas, kini iyang gipahibalo pinaagi sa iyang post sa iyang Facebook Page.
Gitug-an niya nga tungod sa pag-grabe sa sintomas gi-admit na siya sa tambalanan.
“While my breathing was fine, it was my throat pain and cough that was really bothering me. Sakit gyud kaau that I couldn’t sleep. I felt like naay bildo sulod sa akong tutonlan,” sigon pa sa mayor.
“While most people walay bati-on, believe me when I say lisod gyud ma Covid kung ma timingan na symptomatic ka. Kuyog ko ninyo when we say open the economy but we also need to be careful because some people that get infected with Covid are not as lucky as others. Symptomatic gyud ang uban,” dugang pa ni Gullas nga mibase sa iyang kaugalingong kasinatian.
Matud sa mayor, dako iyang suporta aning paningkamot pagbuhi og balik sa ekonomiya, apan kinahanglan gyud nga buhaton kini samtang maglikay sa virus.
Nalipay siya nga ang iyang asawa nga si Rhea ug ang tibuok niya nga banay wala ra maigo sa maong sakit ug dako iyang pasalamat sa mga tawong nipakita og pagmahal tungod sa iyang gidangatan.
Sa laing bahin, gipahibalo ni Dr. Lino Alanzado, pangulo sa City Health Office sa Talisay nga gigamit nila isip isolation facility karon ang Dumlog Elementary School sa Brgy. Dumlog nunot sa nagkadaghang kaso.
Matud niya 60 ka tawo ang mahimong ma-isolate sa maong tunghaan ug dako na sab kini og matabang aron dunay mabutangan sa mga bag-ong kaso nga way mga sintomas.
Ang unang isolation facility sa Barangay Lagtang halos puno na kini sa mga pasyentie mao nga giablihan ang sa Dumlog.
Ang mga pasyente gihatagan sab og inadlaw nga kalihukan aron mawagtang ang ilang kalaay sama sa pag ehersisyo. Ang Talisay estrikto gihapon sa health protocols gumikan sa pagbalik sa kaso sa Covid-19.— IBM (BANATNEWS)
- Latest