RD PRO-7 shootfest kasado na

CEBU, Philippines — Kasado na ang tanan alang sa RD PRO-7 Proficiency Cup nga gikatakda karong Pebrero 17-21 didto sa Cebu Wonderland Shooters Club sa Barangay Agus, Dakbayan sa Lapu-Lapu. Ang lima ka adlaw nga tinirahay nga ipahigayon ubos sa istriktong patakaran sa kaluwasan ug panglawas gipasiugdahan ni Police Regional Office-7 chief BGen Ronnie S. Montejo, inabagan sa Cebu Central Eagles Club nga gipangulohan sa presidente niining si John Rey Saavedra.

Sila si DPWH-7 assistant regional director Engr. Mario Montejo ug CCEC sports committee head Engr. Jerry Maratas maoy mga nag-organisar niini. Usa ka Philippine Shooters and Match Officers Confederation (PSMOC) Level 1-sanctioned match, ang RD PRO-7 Cup naglangkob og 180 ka rounds nga gikatag sa unom ka mga stages.

Ang nag-unang tulo ka adlaw sa kompetisyon eksklusibo sa mga sakop sa kapulisan ug mga law enforcement officers sa Central Visayas aron pagsukod sa ilang kahanas ug kahait motira nga kinahanglan kaayo sa ilang trabaho, samtang ang katapusang duha ka adlaw abli sa mga sibilyan nga shooters.

Sa dili pa moulbo ang mainit nga aksiyon sa firing range, usa ka simpleng seremonyas sa pagbukas ang ipahigayon karong Miyerkules,  Pebrero 17. Gawas ni Gen. Montejo, lain pang mga pinasinuggang dinapit mao sila si Lapu-Lapu City Mayor Junard 'Ahong' Chan, AFP CENTCOM commander LtGen Roberto T. Ancan, PDEA-7 director Levi Ortiz, RTC Judge Marlon Jay Moneva ug prosecutor Liceria L. Rabillas.