Bikers nga dili motuman sa lagda sa trapiko dakpon sa Talisay

CEBU, Philippines — Gipangsikop sa mga sakop sa City of Talisay-Traffic Operation Development Authority (CT-TODA) ang mga nagbisekleta nga wala motuman sa traffic light diha sa Cebu South Coastal Road (CSCR) sa Dakbayan sa Talisay.

Si Jonathan Tumulak, traffic czar sa siyudad miingon nga dugay ra nila kini nga gipatuman gumikan sa mga aksidente nga naglambigit sa mga bikers.

Ang kalapasan sa mga bikers nakuha mismo sa CCTV sa command center nga nakapeligro sa mga motorista ingon man sa mga bikers mismo.

Si Andres Briones Jr., 60 anyos usa sa nadakpan ug adunay tulo nga nakasibat apan sila gukdon pinaagi sa pagpasaka og kaso.

Ang pagdakop nakita sa social media human ang pag umangkon ni Briones ni post niini nga giisyuhan og citation ticket ang iyang paryenti nga driving without license.

Apan sa imbistigasyon ni Tumulak nahitabo lang kini gumikan sa carbonize nga kopya nga ihatag sa nadakpan apan ang orihinal nga kopya nimarka nga kalapasan ni Briones mao ang reckless driving.

Samtang usa ka sakop sa Minglanilla Traffic Commission (MITCOM) ang nasikop samtang nagduty diha sa Poblacion Ward 2, Lungsod sa Minglanilla niadtong Biyernes sa hapon. Ang nasikop mao si Rogeren Delfin Ynot, 28 anyos nga nagpuyo sa Barangay Tunghaan.

Gidakop si Ynot pinasikad sa warrant of arrest batok kaniya sa kasong qualified theft.

Ang kapolisan sa Lapu-Lapu uban sa Minglanilla police mao ang nihimo sa operasyon.

Apan sa iyang pagkasikop nakuhaan siya og .45 nga armas ingon man upat ka mga buhing bala. (BANATNEWS)