Nanglugos napatay

CEBU, Philippines — Patay ang usa ka 22-anyos nga lalaking gipasanginlang nanglugos og menor de edad human gikatahong misuway pagdunggab sa mga polis nga migukod ug moaresto unta kaniya diha sa hilit nga dapit diin siya nagtago sa Sitio Kalubihan, Barangay Logon sa Lungsod sa Daanbantayan kagahapon sa buntag.

Si Police Corporal Luche Layson, imbestigador sa Women’s Section sa Daanbantayan Police Station miila sa suspetsadong namatay mao si Rodelito Doblen Orongan, nagpuyo sa maong dapit.

Matud pa ni Layson nga ang biktima sa suspek mao ang 15 anyos nga dalagitang nag-inusarang nanginhas sa hunasan.

Giingong gitionan sa suspetsado og kutsilyo  ang dalagita ug giguyod kini ngadto mingaw nga lugar ug didto giamong-amongan. Nakasinggit pagpangayo og tabang ang biktima apan wala dayoy nakaresponde.

Human sa krimen, giingong gipalingkod sa suspek sa sakayan ang biktima nga daw silang duha nag-date ug gibaharan kining patyon kun mosumbong.

Dangtan pila ka gutlo, gitugtan sa suspek nga makalakaw ang biktima dungan sa pagbahad og dautan kun mosumbong kini sa ilaha. Apan pagabot sa balay nisumbong gyud ang dalagita sa iyang inahan hinungdan nga midangop sila sa kapolisan.

Si Police Master Sergeant Noel Belocario maoy nangulo sa hot pursuit operation apan nakasibat na ang suspek padung sa bukirong bahin sa lugar hangtud nagabin-an sila sa pagpangita.

Kagahapon sayo sa buntag gipadayon ang pagpangita. Nakuratan ang mga polis sa dihang sa ilang pagsum-ok sa kalasangan giingong kalit silang gilayatan sa suspek ug gisuwayan pagdunggab gamit ang sundang.

Swerteng nakabantay dayon ang mga polis ug napusilan ang suspek nga niresulta sa kamatayon niini. Ang kapolisan padayon karon nga naghimo og imbestigasyon bahin sa hitabo.— IBM (BANATNEWS)