13-oras nga sunog, pabrika naugdaw

CEBU, Philippines — Dul-an sa 13 oras nga gikombati sa kabomberohan ang sunog nga niulbo sa usa ka pabrika diha sa Sitio Pilit, Barangay Cabangcalan sa Dakbayan sa Mandaue ga nagsugod kagahapon sa kaadlawon sa adlaw nga Huwebes.

Ang sunog niulbo sa Treasure Island Inc. nga giingong alas 2:37 sa kaadlawon nagsugod. Giisa kini kutob sa ikatulong alarma ug nakontrolar alas 2:45 na kagahapon sa hapon.

Si Chief Inspector Noel Nelson Ababon, City Fire Marshal maghimo pa og imbestigasyon bahin sa maong sunog, samtang wala pa usab matumbok kun pila ang danyos sa maong hitabo.

Dugang pa ni Ababon, wala hinooy natala nga naangol o nakalas sa maong sunog ug wala sab kini makaapektar sa mga kabalayan sa palibot sa maong kompanysa.

Ang kabomberohan gikan sa mga local government units sa Metro Cebu mitabang ug miresponde. Apil sa miabag maon ang Aviation Firetruck nga adunay Aqueous Film Forming Foam.

Gipahibalo sa maong kompanya nga ang chemical section sa maong planta mao ang nasunog. Mipasalig hinuon ang kadagkoan sa kompanya nga mokooperar sila sa mga otoridad sa pagahimuong imbestigasyon.

Si Senior  Fire Officer  4  Ruel  Arcilla sa Mandaue City Fire Station miingon nga maong itom kaayo ang aso kini tungod kay pabrika sa pintal ang nasunog.

Swerte hinuon nga tungod sa taas nga sementadong paril wala makatapon ang sunog sa kabalayan.

Matud pa ni Felix  Suico Jr. pangulo sa Mandaue City Disaster Risk Reduction Management Office (MCDRRMO) usa ra ka gwardiya ang nagbantay sa pabrika anang pagkahitabo.— Romeo T. Limpangog/IBM (BANATNEWS)