Nidunggab sa uyab ug sa bana nadakpan na

CEBU, Philippines — Nasikop ang usa ka panday kinsa suspetsado sa pagdunggab patay sa giingong iyang hinigugma ug naangol usab ang bana niini atol sa gipahigayon nga hot pursuit operation kagahapon sa kapolisan sa Pilar Police Station, Isla sa Camotes.

Ang nasikop mao si Jessil Capellanes, 31-anyos taga Barangay Eperanza, Lungsod sa Pilar.

Lakip sa nasikop ang giingong kauban ni Capellanes nga drayber sa motorsiklo nga si John Robert Mesias, 19-anyos, taga Barangay Villahermosa sa nahisgutang lungsod.

Si Capellanes giingong diha nadakpi sa Barangay Monserat usa ka bukirang barangay sa lungsod samtang si Mesias diha sa lugar diin nahitabo ang krimen.

Giingong wala nakadawat si Capellanes nga gibiyaan sa iyang uyab tungod kay nakigbalik na kini sa iyang bana ug pamilya.

Ang kapolisan nagtuo nga nakainom og ilimnong makahubog ang suspetsado dihang gibuhat niini ang krimen.

Si Police Staff Sergeant Florante Gorrea, desk officer sa Pilar Police Station nagkanayon nga giandam na nila ang mga dokumento alang sa pagpasaka og kasong murder batok sa suspetsado.

Ang bana sa namatay anaa pa kini sa tambalanan tungod kay giapil kini sa pagdunggab sa suspetsado dihang nitabang kini sa iyang asawa. —BDB (BANATNEWS)